Дропперлік үшін жаза қолданылды!

2025 жылғы 16 қыркүйектен бастап Қазақстанда дропперлікке қатысты шілде айында қабылданған жаңа заң күшіне енді. Енді дропперлік схемаларға қатысқандар қылмыстық жауапкершілікке тартылады.

Дропперлер деген кім?

Бұл – ақша немесе басқа сыйақы үшін өз банк шотына, төлем картасына, электронды әмиянына немесе жеке деректеріне (логиндер, құпиясөздер, SMS-кодтар) қолжетімділікті ұсынатын адамдар. Мұндай әрекеттер арқылы алаяқтар заңсыз жолмен қаржыға қол жеткізеді.

Не істеуге тыйым салынады?

• Үшінші тұлғаларға логин, құпиясөз, PIN-код және басқа қауіпсіздік кодтарын беру, сондай-ақ өз карталарына, шоттарына немесе электронды әмияндарына қолжетімділік ұсыну. Ерекше жағдайлар – жұбайлар мен жақын туыстар.

• Басқа адамның деректері арқылы төлемдер немесе аударымдар жасау.

• Аударымдарда сыйақы үшін делдал болу.

Үшінші тұлғаларға аударымдар немесе төлемдер жасауға мүмкіндік беретін реквизиттерді немесе басқа жеке деректерді ұсынғаны үшін мүліктік айыппұлдан бастап, 5 жылға дейінгі мерзімге бас бостандығын шектеу немесе айыру түріндегі жаза, сондай-ақ мүлікті тәркілеу көзделген.

Банктік шоттарға, төлем құралдарына немесе сәйкестендіру құралдарына заңсыз қол жеткізіп, рұқсат етілмеген төлемдер мен аударымдар жасағаны үшін 3 жылдан 7 жылға дейінгі мерзімге бас бостандығын шектеу немесе айыру, сондай-ақ мүлікті тәркілеу көзделген.

Күмәнді сыйақы үшін өз бостандығыңыз бен мүлкіңізді тәуекелге тікпеңіз. Күдікті ұсыныстар келген жағдайда — дереу банкке немесе құқық қорғау органдарына хабарласыңыз. Заңға енгізілген өзгерістер туралы толығырақ мына жерден біле аласыз.